ثلاث الحمام

بسم الله الرحمن الرحيمـ




ثلاث الحمام اللي تعدّن علي عصير
مصادير/واليمّه على حروة الجهرا


عراض الثنادي كلهن والجناح قصير
أنا أقول(زاجل)قول وأهل الحمام أدرى


عليهن صيارٍ لو يشوفه زبون (الجير)
قضب سبق طيره قولته عرضةٍ قشرى


ثواني وقّفن تقل قرطاس في معصير
وراهن جمعت الشوف بالعين لين أزرى


تمنيّت لو مرسل سلام مع التقدير
معاهن على اللي وين مارحت له ذكرى


أبي يا صلنّه قبل تدرج مساء الخير
أنا خابره ذي حزّته لا بغى يقرى


معاهن ثلاثتهن أبا أطرش التعبير
أبي لا نِستْ وحده تصلّح لها الأخرى


أبي قولة ان فلان لو صار وضعه غير
بقت لك رسومٍ فيه من ليلة المسرى


تحت عينه اليمنى بدا للسهر تأثير
وتمكن سواده من تحت عينه اليسرى


عسى لا وصله العلم يستأنف التفكير
أبي ينشغل فكره من الحين لي بكرى


تمنيت وصله بالفكر ما طلبت كثير
أبا اطري على باله مثل ما علي يطرى


ألا يا عيون اللي تنهض وتل السير
لمحهابعينه يوم زالت مع المجرى


عديمٍ اليا من حل طاريه قالوا طير
تعلّم عليهن (فرخ) من يومها اضرى


عقب ما وصل طلعه تحدّر دلو في بير
عليه الله اكبر لا ضرب مخلبه يغرى


ضربها وغرّت منّه ما بالسوالف خير
وترقّا باثرها مونسٍ ضيعته واحرى


وغدا مثل ضيعة/ذايع الصيت طير(سمير)
سبب دعوةٍ لأمه ولا دونها مذرى


وعقب ضيعته جاب العوض عنْه فاعل خير
عطيّة كريم اطباع ما دوّر المشرى


أثر لا غدا لك طير تلقى بداله طير
فلا شك جرح مضيّع الولف ما يبرى